ᐃᑲᔪᕐᓂᖃᕐᓂᖏᑦ

ᐱᕙᓪᓕᐊᓂᒃᑯᑦ ᐃᑲᔫᑎᑦ

ᓄᓇᕗᑦ ᒫᓐᓇᒃᑯᑦ ᐃᓗᐃᑦᑐᒃᑯᑦ ᐱᔨᑦᑎᕋᐅᑎᖃᓐᖏᓚᑦ ᓂᐱᓕᐅᕆᕕᒻᒥᑦ ᐋᖅᑭᔅᓱᐃᕕᒻᒥᑦ ᐊᑐᐃᓐᓇᐅᑎᑦᑎᔪᒥᑦ ᖃᕋᓴᐅᔭᒃᑰᓕᖓᔪᓂᑦ, ᐱᐅᓂᖅᐸᐅᔪᒥᑦ ᐋᖅᑭᔅᓱᖅᓯᒪᔪᓂᑦ ᑕᑯᔅᓴᐅᑎᑦᑎᓂᕐᒨᖓᔪᓂᑦ ᐊᒻᒪᓗ ᐊᓚᒃᑲᐅᒪᑎᑲᐃᓐᓇᒐᕐᓂᑦ ᓄᓇᕐᔪᐊᕐᒥᐅᓄᑦ. ᐋᖅᑭᓱᖅᑕᐅᕙᑦᑐᓪᓕ ᐃᒻᒥᒃᑰᖓᔪᓄᑦ ᓴᓇᔭᐅᕙᑉᐳᑦ ᓄᓇᕗᒻᒥᑦ ᓂᐱᓕᐅᕆᕕᕋᓛᒥᑦ ᐅᕝᕙᓘᓐᓃᑦ ᖃᓪᓗᓈᓄᑦ ᐊᐅᓚᖅᑎᑕᐅᕙᑦᑐᖅ ᓇᑲᑎᖅᑕᐅᓪᓗᓂ ᑕᑯᓐᓇᒐᒃᓴᖑᖅᑎᑕᐅᓪᓗᓂ. ᐱᓐᖑᖅᑎᑕᐅᔪᒪᔪᖅ ᓄᓇᕗᒻᒥᑦ ᑐᓴᒐᒃᓴᓂᐊᕐᕕᒃᓴᖅ ᐊᒻᒪᓗ ᑕᑯᕋᓐᓈᒐᕐᓄᑦ ᐅᐸᑲᖅᑕᕐᕕᒃ ᓯᕗᓪᓕᖅᐸᐅᔪᒫᖅᑐᖅ ᑕᐃᓐᓇᑑᓗᓂᓗ ᐊᕕᑦᑐᖅᓯᒪᔪᒥᑦ, ᐊᑐᐃᓐᓇᐅᒪᑎᑕᐅᓗᓂ ᐊᒻᒪᓗ ᑐᑭᓯᒋᐊᕐᕕᐅᓗᓂ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓄᑦ ᑲᓇᑕᒥ ᐊᒻᒪᓗ ᑐᑦᑕᕐᕕᐅᓕᕐᓗᓂ ᐋᖅᑭᔅᓱᐃᕕᒃ ᐊᕕᑦᑐᖅᓯᒪᔪᒥᑦ.

ᐅᐸᑲᖅᑕᕐᕕᒃ ᐋᖅᑭᑦᑕᐅᔪᒫᖅᑐᖅ ᓄᑖᓂᑦ ᐋᖅᑭᔅᓱᐃᕕᓐᖑᖅᑎᑕᐅᓗᓂ ᓇᑲᑎᕆᕕᐅᓗᓂᓗ ᐃᓚᓕᐅᑎᓗᒋᑦ ᖃᕋᓴᐅᔭᒃᑯᑦ ᐊᓚᒃᑲᐅᒪᑎᑦᑎᓂᒃᑯᑦ ᐊᒻᒪᓗ ᐋᖅᑭᔅᓱᐃᓂᖅ ᓴᖅᑭᔮᖅᑎᑕᐅᓐᖏᒃᑲᓗᐊᕐᓗᑎ, ᓇᐃᓈᖅᑐᒃᑯᑦ ᐆᑦᑐᕋᐅᑎᐅᔪᓂᑦ ᓄᓇᓕᓐᓂᒥᐅᓄᑦ ᐃᓕᓐᓂᐊᖅᑎᓄᓪᓘᓐᓃᑦ ᐋᖅᑭᔅᓱᒐᑦ. ᐱᔪᓐᓇᖅᓯᓂᕐᓂᑦ ᐃᓚᓕᐅᔾᔨᒐᔭᖅᑐᑦ ᖃᕋᓴᐅᔭᒃᑯᑦ ᐊᐅᓪᓚᖅᑎᑕᐅᓗᑎ ᑐᖅᑯᖅᑕᐅᕙᓪᓗᑎ, ᐅᓪᓗᒥᓕᓴᐃᓪᓗ ᐊᒻᒪᓗ ᑕᕝᕙᓴᐃᓐᓇᖅ ᐊᓚᒃᑲᐅᒪᑎᑕᒐᑦ. ᑕᒪᒃᑯᐊ ᖁᕝᕙᖅᓴᐃᓛᖅᑐᑦ ᐃᓄᐃᑦ ᐅᖃᐅᓯᖓᓐᓂᑦ ᐊᒻᒪᓗ ᐃᓄᐃᑦ ᐃᖏᕐᕋᑎᑕᒐᖏᓐᓂᑦ, ᓄᑖᑦ ᐃᓚᖏᓪᓗ ᖃᖓᑲᓪᓕᓴᐃᑦ, ᐊᑐᐃᓐᓇᐅᔪᑦ ᑕᑯᕋᓐᓈᖅᑎᓄᑦ, ᐊᖑᒻᒪᑦᑎᓗᓂ ᐃᓄᐃᑦ ᑕᑯᓐᓇᒐᒃᑲᓴᓕᕆᔨᒃᑯᑦ ᑐᕌᒐᖓᓐᓂᑦ: ᐸᐸᓐᓂᐊᕐᓂᖅ ᐊᒻᒪᓗ ᑲᔪᖏᖅᓴᐃᓂᖅ ᐃᓄᐃᑦ ᐅᖃᐅᓯᖓᓐᓂᑦ.

ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᑲᓇᑕᒥ ᕿᓐᖒᒪᑦᑎᓯᒪᕗᑦ ᐊᐅᓚᑦᑎᔾᔪᑎᔅᓴᓂᑦ ᐊᐅᓚᒐᕐᓂᑐᒃᑯᑦ ᑮᓇᐅᔭᓕᐅᕐᓂᕐᒥᑦ, ᑮᓇᐅᔭᖃᖅᑎᑕᐅᓂᒃᑯᑦ ᐃᑲᔪᖅᑐᐃᓗᑎ ᐃᖏᕐᕋᑎᑕᒐᕐᓂᑦ. ᓂᐱᓕᐅᕆᕕᖃᕐᓂᖅ ᖁᕝᕙᓯᓐᓂᖅᐸᐅᖃᑕᐅᔪᒥᑦ ᖃᕋᓴᐅᔭᒃᑰᓕᖓᔪᒥᑦ ᓇᑲᑎᕆᕕᐅᓯᓐᓈᕐᓗᓂ ᑮᓇᐅᔭᓕᐅᕈᑎᔅᓴᑦᑎᐊᖑᔪᒫᖅᑯᖅ ᑕᑎᖃᓐᖏᓂᖅᓴᐅᓕᕐᓗᑕ ᒐᕙᒪᑐᖃᒃᑯᓐᓂᑦ. ᑐᕌᒐᕗᑦ ᐅᑯᓂᖓ ᐃᓚᓕᐅᔾᔨᔪᒫᖅᐳᑦ:

  • ᐱᕚᓪᓖᓂᖅ ᐋᖅᑭᔅᓱᒐᕐᓂᖅ ᑕᕐᕆᔮᒃᑯᑦ
  • ᓴᓐᖓᑎᔅᓯᒪᓗᓂ ᐱᓕᒻᒪᔅᓴᓂᕐᒧᑦ ᐃᖅᑲᓇᐃᔭᓕᒻᒪᔅᓴᓂᕐᒥᑦ
  • ᐱᓕᕆᖃᑎᒌᓐᓂᒃᑯᑦ ᐱᕕᖃᖅᑎᑦᑎᓂᕐᒥᑦ
  • ᐋᖅᑭᔅᓱᐃᖃᑎᒌᓐᓂᖃᕐᓂᕐᒥᑦ
  • ᑕᕐᕆᔮᔅᓴᓕᐅᕆᓂᕐᒥᑦ ᐊᔾᔨᒌᓐᖏᑦᑐᒥᑦ ᐊᒥᓲᓂᖅᓴᓂᕐᓗ ᐱᕕᖃᓕᕐᓗᑕ
  • ᐃᖏᕐᕋᑎᑕᒐᑦ ᐊᒥᓲᓂᖅᓴᓄᑦ ᑕᑯᓐᓇᕋᔅᓴᐅᓂᖅᓴᐅᓕᕐᓗᑎ
  • ᑮᓇᐅᔭᓕᐅᕈᑎᔅᓴᑦ ᖁᕝᕙ;ᓯᓐᓂᖅᓴᐅᓕᕐᓗᑎ
  • ᐱᕚᓪᓕᕐᓗᑎ ᐃᓗᓯᓕᕆᓂᕐᒧᑦ ᖃᓄᐃᔾᔭᐃᖅᓯᒪᓂᕐᒧᓪᓗ ᓴᐴᓗᑕᑦ


ᐃᓕᖅᑯᓯᕐᒧᑦ ᐃᑉᐱᓐᓂᕈᑏᑦ

ᓄᓇᕗᒻᒥᑦ ᑐᓴᒐᒃᓴᓂᐊᕐᕕᒃᓴᖅ ᐊᒻᒪᓗ ᑕᑯᕋᓐᓈᒐᕐᓄᑦ ᐅᐸᑲᖅᑕᕐᕕᒃ ᐱᕕᖃᖅᑎᑦᑎᓛᖅᑯᖅ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᓐᓂᑦ ᓯᕕᑦᑐᕐᓗᒋᑦ ᐱᓂᐊᕐᓂᖏᑦ ᐊᒻᒪᓗ ᖁᕝᕙᕆᐊᕐᓗᒋᑦ ᐱᓕᕆᐊᖏᑦ ᐱᕕᑐᓂᖅᓴᒦᓕᕐᓗᑎ ᐊᔾᔨᓕᐅᕆᕕᒻᒥᑦ ᓂᐱᓕᐅᕆᕕᒻᒥᑦ, ᐃᓪᓗᕐᔪᐊᓕᐅᕐᕕᔅᓴᖅ ᐊᑐᐃᓐᓇᐅᓕᖅᑐᓂ ᑐᖅᑯᐃᕕᖃᖅᑐᓂ. ᐃᖏᕐᕋᑎᑕᒐᕐᓄᑦ ᓄᑖᖑᓛᖅᑐᑦ ᐊᐅᓚᔪᓕᐅᕐᓂᖅ, ᐱᓐᖑᐊᓂᒃᑯᑦ, ᑕᑯᕋᓐᓃᖅᑐᓅᖓᔪᑦ ᐆᑦᑑᑎᒋᓗᒍ ᐃᓐᖏᒐᑦ ᐋᖅᑭᔅᓱᒐᑦ ᑕᑯᕋᓈᖅᑎᑕᖃᕐᓗᓂ ᐅᐸᑲᖅᑕᕕᒻᒥᑦ.

ᐃᓪᓗᕐᔪᐊᑉ ᑭᒃᑯᑐᐃᓐᓇᕐᓄᑦ ᒪᑐᐃᓐᖔᓛᖅᑐᖅ, ᕿᒥᕐᕈᔭᔅᓴᖅᑕᖃᕐᓗᓂᓗ. ᐃᓪᓗᕐᔪᐊᑉ ᐃᓯᕐᕕᖓ ᓇᑎᓪᓗᐊᑕᖓᓂ ᑭᒃᑯᑐᐃᓐᓇᕐᓅᖓᓛᖅᑐᖅ, ᑲᑎᒪᕕᖃᐅᕐᓗᓂ, ᑕᑯᔭᒐᖃᐅᕐᓗᓂ ᐊᒻᒪᓗ ᑐᖑᔪᕈᔪᑦᑐᓂ ᐃᓪᓗᕈᓯᖃᐅᕐᓗᓂ ᓂᐱᓕᐅᕆᕕᖏᓐᓂᑦ ᑕᕐᕆᔮᓕᐅᕐᕕᖏᓐᓂᓪᓗ. ᑲᑎᒪᔩᑦ ᑲᑎᒪᕕᖓ ᐊᔾᔨᒌᓐᖏᑦᑐᓂᑦ ᐊᑑᑎᖃᕈᒫᖅᑐᖅ ᖃᑎᒪᕕᐅᓗᓂ, ᑕᕐᕆᔮᓕᐅᕐᕕᐅᓗᓂ ᐊᒻᒪᓗ ᐱᓕᒻᒪᔅᓴᐃᕕᐅᓗᓂ.

ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᐋᖅᑭᔅᓱᐃᕕᖓᑦ ᐊᑐᐃᓐᓇᐅᔪᒫᖅᑐᑦ ᑭᒃᑯᑐᐃᓐᓇᕐᓄᑦ ᑐᖅᑯᐃᕕᖏᓪᓗ ᐱᐅᖅᓱᐊᖅᑕᐅᓗᑎ ᐃᒪᓐᓇ:

  • ᖃᕋᓴᐅᔭᒃᑯᑎᒍᑦ ᑕᑯᔅᓴᐅᑎᒐᔅᓴᐅᓕᕐᓗᓂ
  • ᑕᑯᔭᒃᓴᖅᑕᖃᕐᓗᓂ ᓄᓇᓕᓐᓂᒥᐅᑦ ᓴᓇᐅᒐᖏᓐᓂᑦ
  • ᑕᕐᕆᔮᓕᐅᕐᕕᒻᒥᑦ ᐱᑕᖃᓕᕐᓗᓂ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᖏᓐᓂᑦ ᐊᒻᒪᓗ ᐊᑐᖅᑐᐊᖅᑎᓄᑦ ᐊᓯᖏᓐᓂᑦ ᑕᕐᕆᔮᓕᐅᖅᑎᓂᑦ
  • ᑕᕐᕆᔮᓂᑦ ᑐᖅᑯᐃᕕᖃᓕᕐᓗᑎ ᖃᕋᓴᐅᔭᒃᑯᓪᓗ ᐊᑐᐃᓐᓇᐅᓕᕐᓗᑎ ᑭᒃᑯᑐᐃᓐᓇᕐᓄᑦ
  • ᐃᖏᕐᕋᑎᑕᒐᑦ ᐊᑐᐃᓐᓇᐅᒪᓂᖅᓴᐅᓕᕐᓗᑎ ᑭᒃᑯᑐᐃᓐᓇᕐᓄᑦ ᑕᑯᕋᓐᓈᕐᕕᖃᕐᓗᓂ ᓄᓇᓕᓐᓂᒥᐅᓂᑦ
  • ᑕᕐᕆᔮᓕᐅᖅᑎᓄᑦ ᓴᖅᑭᔮᖅᑎᑦᑎᕕᖃᓕᕐᓗᑎ ᐊᔾᔨᒌᓐᖏᑦᑐᓂᑦ


ᐱᖅᑯᓯᓕᕆᓂᕐᒧᑦ ᐃᑉᐱᓐᓂᕈᑏᑦ

ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᑲᓇᑕᒥ ᑐᖅᑯᐃᓯᒪᕗᑦ ᑕᕐᕆᔮᓂᑦ ᐊᕐᕌᒍᓄᑦ ᐊᕙᑎᑦ ᖁᓕᓐᓄᓪᓗ (30), ᑕᑯᓐᖑᐊᖅᑐᒋᑦ ᐊᕐᕌᒍᓄᑦ 9,000-ᓄᑦ ᐃᓗᓕᓕᓐᓂᑦ ᑕᕐᕆᔮᓂᑦ ᐃᓄᐃᑦ ᐃᓱᒪᔾᔪᓯᖏᓐᓂᑦ, ᐊᕕᑦᑐᖅᓯᒪᔫᒃ ᒪᕐᕉᒃ ᐊᕕᒻᒪᑎᒃ, ᐱᓐᖑᖅᑎᑕᐅᓂᖏᑦ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᑦ, ᐃᓱᒪᔾᔪᓯᐅᓯᒪᔪᑦ ᐱᓐᖑᖅᑎᑕᐅᓯᒪᔪᓪᓗ ᐃᓄᐃᑦ ᓄᓇᑖᕈᑎᖏᑦ, ᓄᓇᕗᑦ ᐱᓐᖑᖅᑎᑕᐅᓂᖓ ᐊᒻᒪᓗ ᓄᑖᓐᖑᑎᓪᓗᒍ ᒐᕙᒪᓕᕆᓂᖅ, ᐃᓄᓕᕆᓂᖅ ᐃᓕᖅᑯᓯᓕᕆᓂᕐᒧᑦ ᐱᒋᐊᖅᑎᓪᓗᒍ.

ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᓄᐊᓯᒪᔭᖏᑦ ᑕᕐᕆᔮᑦ ᒫᓐᓇᒃᑯᑦ ᑎᓴᒪᓂᑦ ᐃᓪᓗᖁᑎᒋᔭᐅᔪᓂᑦ ᑐᖅᑯᐃᕕᒻᒦᒻᒪᑕ ᐅᑭᐅᖅᑕᖅᑐᒥᑦ ᐊᔾᔨᒌᓐᖏᑦᑐᓂᑦ ᓂᐱᖅᑲᕐᓇᐅᔭᓂᑦ ᓂᐱᓕᐅᖅᓯᒪᓪᓗᑎ. ᑖᒃᑯᐊ ᐊᔾᔨᓕᐊᕆᓯᒪᓐᖏᒻᒪᑦ, ᑐᖅᑯᖅᑕᐅᓯᒪᓐᖏᒻᒪᑕ. ᐃᓘᓐᓇᐸᓗᖏᑦ ᐃᓪᓗᓃᑉᐳᑦ ᓱᒃᑯᐸᓪᓕᐊᔪᓂᑦ.

ᐃᓪᓗᕐᔪᐊᖑᔪᒫᖅᑐᖅ ᐃᓚᓕᐅᔾᔨᓛᖅᑐᖅ ᐃᓄᓐᓂᑦ ᑕᕐᕆᔮᓕᐊᑦ ᑐᖅᑯᐃᕕᖓᓂᑦ ᐊᒻᒪᓗ ᐅᖃᓕᒫᒐᖃᕐᕕᒻᒥᑦ ᐊᒻᒪᓗ ᑐᖅᑯᐃᕕᒻᒥᑦ ᖃᕋᓴᐅᔭᒃᑰᓕᖓᔪᓇᖅᑐᓂᑦ ᐊᕐᕌᒍᓄᑦ ᐊᕙᑎᓄᑦ ᑕᓪᓕᒪᓄᓪᓗ (25) ᐋᖅᑭᔅᓲᒪᔭᐅᔪᓂᑦ; ᑖᒃᑯᐊ ᑕᕐᕆᔮᑦ ᐊᐅᓚᑦᑎᔨᓂᑦ ᐊᒻᒪᓗ ᑭᐅᔨᖏᓐᓂᑦ ᑭᒡᒍᓯᖃᖅᑎᑦᑎᒍᓐᓇᕋᔭᖅᑐᑦ ᕿᓄᔾᔪᑕᐅᕙᑦᑐᓂᑦ ᑕᕐᕆᔮᓂᑦ.

ᐃᓪᓗᕐᔪᐊᖑᔪᒫᖅᑐᖅ ᓴᐳᔾᔨᔪᒫᖅᑯᖅ ᑐᖅᑯᐃᕕᖓᑎᒍᑦ ᐊᒻᒪᓗ ᐊᐅᓚᑦᑎᓂᕐᒥᑦ ᐱᕚᓪᓖᓗᓂ ᐊᔾᔨᒌᓐᖏᑦᑐᓄᑦ ᑕᕐᕆᔮᓄᑦ ᑐᓴᒐᒃᓴᓕᐊᖑᔪᓂᓪᓗ, ᓄᑕᐅᔪᓄᓪᓗ ᑕᕐᕆᔮᓕᐊᖑᕙᓪᓕᐊᔪᓄᑦ. ᓂᐱᓕᐅᒐᓄᑦ ᑐᖅᑯᐃᕕᒃ ᐃᓚᓕᐅᔾᔨᓛᖅᑯᖅ ᐅᖁᓂᖓ:

  • ᓂᓪᓕᑖᕈᑎᖃᕐᓗᓂ ᓂᐲᑦ ᐊᔾᔩᑦ ᓈᒻᒪᒋᔭᖏᓐᓂᑦ
  • ᑭᐊᔾᔭᐃᖅᓯᒪᔾᔪᑎᖃᕐᓗᑎ ᓂᐱᔅᓴᓄᑦ ᓴᐳᑎᔾᔪᑎᒥᑦ (ᐅᖅᑰᓴᐅᑎᒥᑦ, ᓂᓪᓚᑖᕈᑎᒥᑦ) ᐊᒻᒪᓗ ᑐᖅᑯᐃᕕᒃ ᑭᐊᒃᑭᔭᐃᖅᓯᒪᔾᔪᑎᖃᕐᓗᓂ
  • ᐋᖅᑭᐅᒪᔾᔪᑎᒥᑦ ᐊᐅᓚᑦᑎᔾᔪᑎᖃᕐᓗᑎ ᖃᕋᓴᐅᔭᕐᒥᑦ ᐱᓕᕆᕕᒻᒥᑦ
  • ᐃᓕᔾᔨᕕᖃᕐᓗᑎ ᓂᐱᔅᓴᓂᑦ ᐋᖅᑭᔅᓱᐃᕕᔅᓴᒥᑦ, ᐴᖅᑐᐃᕕᒋᕙᓪᓗᒍ ᐊᓯᖏᓐᓄᓪᓗ
  • ᑐᖅᑯᐃᕕᖃᕐᓗᑎ ᓇᓗᓇᐃᔭᖅᓯᒪᑦᑎᐊᖅᑐᒥᑦ ᑐᓴᐅᒪᖃᑦᑕᐅᑎᓂᕐᒧᑦ ᒥᐊᓂᕆᔭᕐᓂᖅᑐᒥᑦ
  • ᑐᖅᑯᐃᕕᖃᕐᓗᑎ ᓄᑖᓄᑦ ᐱᕙᓪᓕᐊᔭᒥᓐᓄᑦ (ᓂᐱᔅᓴᑦ, ᑐᓴᖃᑦᑕᐅᑎᓕᕆᓂᕐᒧᑦ ᐃᑲᔫᑎᑦ, ᖃᕋᓴᐅᔭᓄᑦ ᑐᖅᑯᐃᕕᑦ)


ᑐᓴᐅᒪᖃᑦᑕᐅᑎᓕᕆᔾᔪᑎᓄᑦ ᐃᑉᐱᓐᓂᕈᑏᑦ

ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐱᓕᕆᓂᖅ ᐊᓯᔾᔨᐸᓪᓕᐊᒻᒪᑦ ᒫᓐᓇᒃᑯᑦ ᑕᐃᒫᓪᓗᐊᖅ ᐱᓚᐅᖅᓯᒪᑎᓪᓗᒍᑦ ᑕᕐᕆᔮᑦ ᐊᒥᐊᖃᓐᖏᑦᑑᓯᒪᓪᓗᑎ ᐊᒥᐊᖃᓕᕐᓂᑰᒻᒪᑕ. ᑐᓴᐅᒪᖃᑦᑕᐅᑎᓕᕆᓂᒃᑯᑦ ᐊᖅᑯᑏᑦ ᐅᓐᓄᐊᖏᓐᓇᐅᔮᖅᑐᖅ ᐊᓯᔾᔨᐸᓪᓕᐊᓯᒪᕗᑦ. ᑕᓚᕖᓴᐃᑦ ᑕᐃᒪᐃᑐᐃᓐᓇᓚᐅᖅᑎᓪᓗᒋᑦ ᓇᑭᖅᑐᒻᒪᕆᓕᖅᑐᑎ ᐊᖑᒻᒪᑎᔾᔪᑕᐅᒡᒐᓕᖅᑐᑦ ᑐᓴᐅᒪᖃᑦᑕᐅᑎᓕᕆᔾᔪᑦᑎᒃᑯᑦ ᐅᓪᓗᒥ. ᓂᕆᐅᓐᓂᕆᔭᐅᔪᑦ ᑕᓚᕖᓴᑦᑎᐅᔪᒧᑦ ᕿᒥᕐᕈᒍᓂ ᑕᕐᕆᔮᓕᐊᖑᓯᒪᔪᒥᑦ ᑕᕐᕆᔭᕐᕕᒻᒥᑦ ᐊᖏᕐᕋᒥᓪᓘᓐᓃᑦ ᑕᓚᕖᓴᐃᑦ ᓇᑭᖅᑐᒻᒪᕆᐅᓕᖅᑎᓪᓗᒋᑦ ᐊᑭᑭᓪᓕᒋᐊᖅᓯᒪᔪᒻᒪᕆᐅᓕᖅᑐᑎᓪᓗ. ᑕᓚᕖᓴᒃᑯᑦ ᑕᑯᓐᓇᕋᔅᓴᑦ ᐊᒥᓱᒻᒪᕆᐅᓕᖅᑎᓪᓗᒋᑦ ᐋᖅᑭᔅᓱᐃᔨᑦ ᐃᒻᒥᒃᑰᖓᔪᑦ ᐊᒥᓲᓕᖅᑎᓪᓗᒋᑦ, ᓂᕆᐅᒐᐅᔪᑦ ᖁᕝᕙᖅᓯᒪᕗᑦ ᐊᒥᓱᒃᑲᓂᕐᓂᑦ ᐊᓚᒃᑲᖅᑐᖃᓛᕆᐊᖓ. ᐱᔪᓐᓇᕐᓂᐅᔭᕆᐊᓖᑦ ᖁᕝᕙᖅᑎᑕᐅᓯᒪᕗᑦ ᐊᒻᒪᓗ ᑐᓴᖃᑦᑕᐅᑎᓕᕆᓂᕐᒧᑦ ᐋᖅᑭᔅᓱᐃᔨᑦ ᐊᖑᒻᒪᑦᑎᒋᐊᑐᕗᑦ ᖃᑭᒪᓂᐊᕈᑎ.

ᐋᖅᑭᔅᓱᐃᓃᑦ ᐊᓪᓛᑦ ᐊᓯᔾᔨᖅᓯᒪᔪᑦ. ᓂᐱᓕᐅᕆᕖᑦ ᐱᓪᓗᕆᑦᑐᒥᑦ ᐊᐅᓚᑦᑎᓂᖃᖅᐸᑉᐳᑦ, ᐊᔾᔨᓕᐅᕈᑎᒥᑦ ᐱᓪᓗᕆᑦᑑᔪᒥᑦ ᓴᖅᑭᔮᖅᑎᑦᑎᓂᕐᒧᑦ, ᑕᑯᔅᓴᐅᑎᑕᐅᑲᐃᓐᓇᓲᓂᑦ ᐊᒻᒪᓗ ᓴᖅᑭᔮᖅᑎᑕᐅᔪᓂᑦ ᐃᑲᔪᖅᑐᐃᓲᖑᕗᑦ ᐅᖁᒪᐃᓐᓂᕆᔭᖏᓐᓂᑦ, ᐊᖏᓂᖏᓐᓂᑦ ᐊᒻᒪᓗ ᐊᑭᒋᔭᖏᓐᓂᑦ ᐊᑐᖅᑕᐅᕙᑦᑐᑦ ᐊᑦᑎᔅᓯᕙᓪᓕᐊᑎᓪᓗᒋᑦ. ᐅᓪᓗᒥ, ᐃᖏᕐᕋᑎᑕᒐᑦ  ᐊᑕᐅᑦᑎᒃᑯᑦ ᐋᖅᑭᓱᖅᑕᐅᕙᓕᖅᑎᓪᓗᒋᑦ, ᐃᓱᒫᓗᓐᓇᖅᑐᓂᑦ ᐃᓚᓕᐅᔾᔨᓲᖑᒻᒪᑕ ᐃᓪᓗᖁᑎᒋᔭᐅᔪᒧᑦ, ᐱᓗᐊᖅᑐᒥᑦ ᐊᔾᔨᓕᐅᕆᓚᐅᖅᑎᓪᓗᒋᑦ ᐋᖅᑭᔅᓱᐃᓂᕐᒥᑦ. ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᑲᓇᑕᒥ ᐃᓪᓗᖁᑎᖓ ᐋᖅᑭᑦᑕᐅᓯᒪᓂᑯᒃ 1980-ᖏᓐᓂᑦ ᐋᖅᑭᔅᓱᐃᓂᕆᕙᔪᔭᖏᓐᓂᑦ; ᐅᓪᓗᒥᓕᓴᕐᓂᑦ ᐋᖅᑭᓱᐃᔾᔪᓯᐅᔪᑦ ᐊᖑᒻᒪᑎᔪᓐᓇᓐᖏᑕᕗᑦ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᐊᑐᖅᐸᑦᑕᖏᓐᓂᑦ.

ᓄᓇᕗᒻᒥᑦ ᑐᓴᒐᒃᓴᓂᐊᕐᕕᒃᓴᖅ ᐊᒻᒪᓗ ᑕᑯᕋᓐᓈᒐᕐᓄᑦ ᐅᐸᑲᖅᑕᕐᕕᒃ ᓄᓇᕘᑉ ᓯᕗᓪᓕᖅᐹᕆᓂᐊᖅᑕᖓ ᐃᓪᓗᕐᔪᐊᖅ ᑕᒪᒃᑮᔪᖅ ᓂᐱᓕᐅᕆᕕᒃ ᐊᒻᒪᓗ ᐊᔾᔨᓕᐅᕆᓚᐅᖅᑎᓪᓗᒋᑦ ᖁᕝᕙᓯᑦᑐᒥᑦ ᑕᑯᔅᓴᐅᑎᑕᒐᖅ, ᓄᑖᑦᑎᐊᖅ ᓯᓚᕐᔪᐊᕐᒥᑦ ᑕᕐᕆᔮᓕᐅᖅᑎᓄᑦ ᐊᖑᒻᒪᑦᑎᔪᖅ. ᓄᓇᕗᒻᒥᑦ ᐋᖅᑭᔅᓱᐃᔨᑦ ᐃᓚᐃᓐᓇᖏᓐᓂᑦ ᖁᑦᑎᓂᖅᐹᓂᑦ ᑕᕐᕆᔮᓕᐅᕈᑎᓂᑦ ᐊᑐᐃᓐᓇᖃᓕᖅᐳᑦ ᑭᓯᐊᓂᑦᑕᐅᖅ ᑕᕐᕆᔮᓕᐅᓚᐅᖅᑎᓪᓗᒋᑦ ᑭᖑᓂᐊᒍᑦ ᐋᖅᑭᔅᓱᒐᔅᓴᓂᑦ – ᐊᒻᒪ ᓂᐱᓕᐅᕆᕕᒻᒥᑦ ᐋᖅᑭᔅᓱᐃᕕᒻᒥᑦ – ᖃᓪᓗᓈᓂᑦ ᑭᓯᐊᓂ ᐊᑐᐃᓐᓇᐅᒻᒪᑕ, ᐊᑭᑐᔪᐊᓘᓪᓗᑎᓪᓗ.

ᐅᐸᑲᖅᑕᕐᕕᐅᔪᒫᖅᑐᖅ ᑕᒪᒃᑮᓐᓂᒃ ᐃᓚᓕᐅᔾᔨᕗᖅ ᐅᓪᓗᒥᐅᔪᖅ ᓯᕗᓂᑦᑎᓂᓪᓗ ᓂᐱᓕᐅᕆᕕᓐᓂᑦ ᐱᑕᖃᕆᐊᖃᖅᑑᔪᓂᑦ, ᐊᒻᒪᓗ ᑲᑎᑎᕆᔪᓐᓇᖅᑐᓂᑦ ᓄᑖᓂᑦ ᐋᖅᑭᔅᓲᑎᒐᕐᓂᑦ ᐱᓕᕆᔾᔪᓯᓂᓪᓗ. ᐃᓪᓗᕐᔪᐊᖑᔪᒫᖅᑐᖅ ᐋᖅᑭᐅᒪᖁᔭᐅᓂᖓ, ᐱᓕᕆᔾᔪᑎᔅᓴᖏᑦ ᐊᒻᒪᓗ ᐊᐅᓚᔾᔪᑎᔅᓴᖏᑦ ᐃᖅᑲᓇᐃᔮᓂᑦ ᐱᔭᕆᐊᑭᔅᓯᑎᑦᑎᓛᖅᑐᖅ ᐃᖅᑲᓇᐃᔭᖅᑎᖏᓐᓄᑦ. ᐃᓪᓗᕐᔪᐊᖅ ᐊᓪᓚᕝᕕᖃᐅᓛᖅᑐᖅ ᓇᑲᑎᕆᕕᓐᓂᑦ, ᐱᕕᑐᔪᒥᑦ ᐊᔾᔨᓕᐅᕆᕕᒻᒥᑦ ᒪᕐᕉᓐᓂᒃ ᖁᓕᕇᑦᑑᒐᔭᖅᑐᓂᒃ ᐱᕕᖃᕐᓗᓂ ᖃᐅᒪᖃᐅᑦᑎᐊᕐᓗᓂ ᐊᔾᔨᓕᐅᕆᕕᑦᑎᐊᕙᐅᓗᓂ, ᐊᒻᒪᓗ ᐊᐅᓚᑦᑎᕕᖃᕐᓗᑎ ᐃᓪᓗᕈᓯᕐᓂᑦ ᐊᒡᒍᑐᖅᓯᒪᔪᓂᑦ. ᓂᐱᓕᐅᕆᕕᒃ ᐊᒻᒪᓗ ᐊᑕᐅᓯᕐᒥᑦ ᐊᔾᔨᓕᐅᕈᑎᒥᑦ ᓇᑭᖅᑑᔪᒥᑦ ᐋᖅᑭᓱᐃᕕᖃᕐᓗᓂ ᓈᒪᓗᓂ, ᐱᕕᖃᖅᑎᑦᑎᔪᒥᑦ ᐊᒥᓱᓂᑦ ᐊᔾᔨᒌᓐᖏᑦᑐᓂᑦ ᐃᖏᕐᕋᑎᑕᒐᕐᓂᑦ ᐊᓚᒃᑲᐅᒪᑎᑦᑎᔪᓐᓇᖅᑐᓂᑦ.

ᑐᓴᐅᒪᔾᔪᑎᓕᕆᔾᔪᑎᔅᓴᑦ  ᐱᕚᓪᓖᓛᖅᑐᑦ ᖃᕋᓴᐅᔭᒃᑯᑦ ᐊᓚᒃᑲᐅᒪᔪᓐᓇᖅᓯᓗᑎ, ᐃᓄᒋᐊᔅᓯᑎᓪᓗᒋᑦ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᑕᑯᕋᓐᓈᖅᑎᖏᑦ, ᑕᑯᓐᓇᒐᒃᓴᑦᑎᐊᕙᓕᐅᕈᓐᓇᖅᓯᓗᑎ, ᐊᑭᑭᓐᓂᓴᒃᑯᑦ ᐊᒻᒪᓗ ᑕᐅᖅᓰᒍᓐᓇᖅᓯᓗᑎ ᐃᖏᖅᑎᓄᑦ ᐋᖅᑭᔅᓱᐃᔨᓄᓪᓗ ᓄᓇᕗᒻᒥᑦ. ᐱᕚᓪᓖᓃᑦ ᐅᑯᓂᖓ ᐃᓚᓕᐅᔾᔨᓛᖅᑐᑦ:

  • ᐃᓐᖏᖅᑏᑦ, ᐱᓐᖑᐊᖅᑏᑦ ᐊᓚᒃᑲᐅᒪᓂᖃᕐᓂᖅᓴᐅᓕᕐᓗᑎ ᓄᓇᓕᒻᒥᑦ, ᐊᕕᑦᑐᖅᓯᒪᔪᓕᒫᒥᓪᓗ;
  • ᑕᕐᕆᔮᔅᓴᓕᐅᖅᑏᑦ ᐋᖅᑭᔅᓱᒐᖏᑦ ᐱᔪᒪᔭᐅᓂᖃᕐᓂᖅᓴᐅᓕᕐᓗᑎ ᓄᓇᓕᒻᒥᑦ ᐊᕕᑦᑐᖅᓯᒪᔪᒥᓪᓗ;
  • ᐊᓚᒃᑲᐅᒪᓂᖅᓴᐅᓕᕐᓗᑎ ᓴᓇᐅᒐᑎᒍᑦ ᐃᓕᖅᑯᓯᑎᒍᓪᓗ ᑲᑐᔾᔨᖃᑎᒌᖏᓪᓗ ᐃᖏᕐᕋᑎᑕᒐᖏᓐᓄᑦ, ᐱᔨᑦᑎᕋᐅᓯᖏᓐᓄᑦ ᐊᒻᒪᓗ ᑭᒡᒐᖅᑐᐃᓂᒃᑯᑦ ᐱᓕᕆᐊᓄᑦ.