ᐃᓪᓗᕐᔪᐊᖅ

ᓄᓇᕗᒻᒥᑦ ᑐᓴᒐᒃᓴᓂᐊᕐᕕᒃᓴᖅ ᐊᒻᒪᓗ ᑕᑯᕋᓐᓈᒐᕐᓄᑦ ᐅᐸᑲᖅᑕᕐᕕᒃ ᐃᓂᖃᖅᐳᖅ ᐃᖃᓗᐃᑦ ᐱᓕᕆᕕᓪᓗᐊᑕᖏᑕ ᒐᕙᒪᒃᑯᓪᓗ ᐊᑯᓐᓇᖓᓐᓂᑦ, ᖃᓂᔅᓴᖅᑐᓂ ᒪᓕᒐᓕᐅᕐᕕᒻᒥᑦ. ᐋᖅᑭᑦᑕᐅᓪᓗᐊᑕᖅᓯᒪᔪᓂᑦ ᑐᓐᖓᕕᖃᖅᐳᖅ ᐃᓄᐃᑦ ᓄᓇᖁᑎᖏᓐᓂᑦ ᑐᓂᕐᕈᑕᐅᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖓᓐᓂᑦ ᐊᒻᒪᓗ ᐊᑐᐃᓐᓇᐅᕗᖅ ᓴᓇᔭᐅᕙᓪᓕᐊᓂᔅᓴᖓᓄᑦ. ᐱᔪᒪᔾᔪᑎᓕᐊᖑᓯᒪᔪᖅ 8,000-ᒥᑦ ᐱᕕᑐᓂᖃᖅᑐᓂ, ᐃᓪᓗᔪᐊᕐᓗ ᐊᑭᖃᕋᔭᓐᖑᐊᖅᑐᓂ 8.3 ᒥᓕᐊᓂᑦ. (ᐃᓚᓕᐅᑦᑐᒋᑦ ᐃᓗᓕᔅᓴᖏᑦ ᐱᓕᒻᒪᔅᓴᐃᓂᕐᓗ) ᐅᐸᑲᖅᑕᕐᕕᒃ ᐃᓚᓕᐅᔾᔨᓛᖅᑯᖅ ᐅᑯᓂᖓ:

  • ᐱᓪᓗᕆᑦᑑᔪᖅ, ᓴᓇᒪᓂᖓ ᓄᑖᖑᓪᓗᓂ, ᖃᕋᓴᐅᔭᒃᑰᖓᓪᓗᓂ ᐃᓪᓗᕐᔪᐊᖅ ᓂᐱᓕᐅᕆᓂᒃᑯᑦ ᑕᕐᕆᔮᓕᐅᕐᓂᑯᓪᓗ, ᓂᐱᓕᐅᒐᓪᓗ, ᑕᑯᕋᓐᓈᒐᑦ, ᐃᓐᖏᖅᑏᑦ ᐊᒻᒪᓗ ᐋᖅᑭᔅᓱᐃᔩᑦ ᓄᓇᕗᒻᒥᑦ ᐃᖅᑲᓇᐃᔭᖅᑐᑦ.
  • ᓂᐱᓕᐅᕆᕕᒃ ᐊᑐᐃᓐᓇᐅᒪᔪᖅ ᑕᕝᕙᓴᐃᓐᓇᖅ ᐊᓚᒃᑲᐅᒪᔪᓐᓇᕐᓗᓂ ᐃᓚᓕᐅᔾᔨᓪᓗᓂ ᑕᑯᕋᓐᓈᕕᒻᒥᑦ ᐊᒻᒪᓗ ᐱᕕᖃᕐᓗᓂ ᑕᑯᕋᓐᓈᖅᑎᑦ ᑕᕝᕙᐅᔪᓐᓇᕐᓗᑦ ᐊᓚᒃᑲᐅᒪᑎᑦᑎᑎᓪᓗᒋᑦ.
  • ᐊᓪᓚᕝᕕᖃᕐᓗᑎ ᐊᒻᒪᓗ ᐊᔾᔨᓕᐅᕆᓚᐅᖅᑎᓪᓗᒋᑦ ᐃᓂᖃᕐᓗᑎ ᐃᓄᐃᑦ ᑕᑯᔅᓴᐅᑎᑦᑎᓕᕆᔨᒃᑯᑦ ᐱᔨᑦᑎᕋᖅᑎᖏᓐᓄᑦ.
  • ᐃᓄᐃᑦ ᑕᕐᕆᔮᓕᐊᖏᑦ ᑐᖅᑯᐃᕕᒃ.

ᓄᓇᕗᒻᒥᑦ ᑐᓴᒐᒃᓴᓂᐊᕐᕕᒃᓴᖅ ᐊᒻᒪᓗ ᑕᑯᕋᓐᓈᒐᕐᓄᑦ ᐅᐸᑲᖅᑕᕐᕕᒃ ᐃᓗᓕᖃᐅᓛᖅᐳᖅ ᐱᓪᓗᕆᑦᑐᓂᑦ ᐋᖅᑭᓱᐃᔾᔪᑕᐅᔪᒫᖅᑐᓂᑦ – ᓇᑭᖅᑐᒥᑦ ᐱᓕᕆᔾᔪᑎᑦ ᐊᒻᒪᓗ, ᖃᕋᓴᐅᔭᒃᑯᑎᒍᑦ ᓇᑲᑎᕆᔾᔪᑎᓂᑦ. ᐃᓪᓗᕐᔪᐊᖅ ᐱᕚᓪᓖᓛᖅᑯᖅ ᐊᔾᔨᒌᓐᖏᑦᑐᓂᑦ ᐊᓚᒃᑲᐅᒪᑎᒐᕐᓂᑦ ᐊᒻᒪᓗ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᐅᓪᓗᒥᒃᑯᑦ ᐋᖅᑭᔅᓱᒐᖏᓐᓂᑦ, ᐱᔪᓐᓇᕐᓂᕆᔭᑦᑎᓐᓂᑦ ᐱᕚᓪᓖᒻᒥᓗᑎ ᑮᓇᐅᔭᓕᐅᕐᓂᒃᑯᑦ ᐊᒻᒪᓗ ᓄᑕᐅᔪᒥᑦ ᐋᖅᑭᔅᓱᐃᓂᕐᒥᑦ ᐃᓚᓐᖑᐃᓗᑎ ᐱᓕᕆᓂᒃᑯᑦ ᐊᒻᒪᓗ ᐃᓐᖏᖅᑎᓄᑦ, ᐊᑐᖅᑐᐊᖃᑦᑕᕈᒫᖅᑐᓂᑦ ᐊᒻᒪᓗ ᑕᑯᕋᓐᓈᖅᑎᓂᑦ ᓄᓇᕗᒻᒥᑦ ᐊᒻᒪᓗ ᐊᓯᖏᓐᓂᑦ.

ᓄᓇᕗᒻᒥᑦ ᑐᓴᒐᒃᓴᓂᐊᕐᕕᒃᓴᖅ ᐊᒻᒪᓗ ᑕᑯᕋᓐᓈᒐᕐᓄᑦ ᐅᐸᑲᖅᑕᕐᕕᒃ ᐃᓂᖃᖅᑎᑦᑎᓛᕐᒥᔪᖅ ᐃᓄᐃᑦ ᑕᕐᕆᔮᓕᐊᖏᓐᓂᑦ ᑐᖅᑯᐃᕕᒻᒥᑦ ᐸᐸᓐᓂᐊᕐᓗᒋᑦ ᐊᒻᒪᓗ ᑐᖅᑯᕐᓗᒋᑦ ᓄᐊᓵᖑᓯᒪᔪᑦ ᐊᔾᔨᓕᐅᒐᑐᖃᐃᑦ ᑕᕐᕆᔮᓕᐊᒥᓃᓪᓗ ᐃᓄᓐᓂᑦ 1970-ᖏᓐᓂᑦ.

ᑐᓐᖓᕕᓪᓗᐊᑕᕆᑎᓪᓗᑎᒍᑦ ᐃᓕᖅᑯᓯᑦᑕ ᐋᖅᑭᔅᓯᒪᓂᖓ, ᓄᓇᕗᒻᒥᑦ ᑐᓴᒐᒃᓴᕆᐊᕐᕕᒃᓴᖅ ᐊᒻᒪᓗ ᑕᑯᕋᓐᓈᕋᕐᓄᑦ ᐅᐸᑲᖅᑕᕐᕕᒃ ᖃᐅᔨᒪᔮᖑᓂᖅᓴᐅᓕᓛᖅᑐᖅ ᐅᓂᒃᑳᖑᓂᖅᓴᐅᕙᓕᕐᓗᓂ ᐊᓚᒃᑲᐅᒪᑎᑕᐅᓂᖅᓴᐅᓕᕐᓗᑎ ᓄᓇᕗᒻᒥᑦ ᐃᓐᖏᖅᑏᑦ ᑕᑯᕋᓐᓈᒐᓪᓗ, ᐱᐅᓂᖅᐹᑦ ᓄᓇᕗᒻᒥᑦ ᑲᓇᑕᒧᑦ ᓄᓇᕐᔪᐊᒧᓪᓗ ᑐᓂᕐᕈᑕᐅᓗᑎ. ᐋᖅᑭᓱᐃᓂᖅ ᖁᕝᕙᓯᓕᕐᓗᓂ ᐱᓪᓗᕆᑦᑑᓕᕐᓗᓂᓗ, ᓄᓇᕗᒻᒥᑦ ᓴᓇᐅᒐᐅᓕᕐᓗᑎ, ᐃᓄᐃᑦ ᑕᑯᓐᓇᒐᒃᓴᓕᕆᔩᑦ ᐱᓕᕆᖃᑎᕗᓪᓗ ᐱᓐᖑᖅᑎᑦᑎᓛᓕᖅᑐᑦ ᐃᖃᓗᓐᓂᑦ, ᑕᑯᓐᓇᒐᐅᓗᓂ ᓄᓇᕗᒻᒥᑦ, ᑎᒍᔪᓐᓇᖅᓯᔭᕗᑦ ᐃᓕᖅᑯᓯᑦᑕ ᐱᕙᓪᓕᐊᓂᖏᓐᓂᑦ, ᐊᒻᒪᓗ ᐅᐱᒍᓱᑉᐳᒍᑦ ᐃᓕᓴᕐᓇᐅᑎᖃᓛᕐᖓᑦ ᓄᓇᖃᖅᑳᖅᑐᑦ ᑕᑯᓐᓇᒐᒃᓴᓂᑦ ᑲᓇᑕᒥ.