ᑭᓐᖒᒪᓇᖅᑐᖅ

ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᑲᓇᑕᒥ ᐱᓕᕆᕕᒋᒋᐊᓐᖓᓚᐅᖅᓯᒪᔭᖓᑦ ᑭᒪᒃᑲᑰᓚᐅᖅᓯᒪᔪᒥᓂᖅ ᐃᓕᓴᕕᐅᓪᓗᓂ ᐃᓐᓇᕐᓄᑦ ᐃᓕᓴᕕᒥᓂᖅ. ᐃᓪᓗ ᓱᕋᖅᑎᑕᐅᒻᒪᑦ ᐊᑦᑕᓇᕐᓂᖓᓄᑦ, ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᐊᑐᖅᑐᐊᓕᓚᐅᖅᓯᒪᔪᑦ ᐃᓪᓗᒥᑦ ᐊᑐᖅᓯᒪᔪᒥᑦ, ᐃᓪᓗᒥ ᓇᔪᖅᑕᐅᓚᐅᖅᓯᒪᔪᒥᓂᕐᒥᑦ ᐃᖃᓗᓕᕆᔨᒃᑯᓐᓂᑦ ᐃᒪᓕᕆᔨᒃᑯᓂᓪᓗ, ᑕᐃᓐᓇ ᓇᔪᒐᐅᕙᓐᓂᑯᒥᓂᖅ ᐅᓇᑕᖅᑐᔅᓴᓄᑦ 1950-ᖏᓐᓂᑦ ᓴᓇᔭᐅᓕᖅᑭᔅᓯᒪᔪᒥᓂᕐᒥᑦ.

ᑕᐃᓐᓇ ᐃᓪᓗ ᓇᔪᖅᓯᒪᓕᖅᑲᕗᑦ ᐊᕐᕌᒍᓄᑦ ᐊᕙᑎᓄᑦ, ᐃᓪᓗ ᐃᓗᓕᖃᐅᖅᑯᖅ ᑕᕐᕆᔮᓕᐊᒥᓂᕐᓂᑦ ᖃᖓᑲᓪᓚᓂᑦ, ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᐊᓪᓚᕕᓪᓗᐊᑕᖓᑦ, ᐋᖅᑭᔅᓱᐃᕕᖓᑦ, ᑕᑯᔅᓴᐅᑎᑦᑎᕕᖓᑦ, ᐱᓕᒻᒪᔅᓴᐃᕕᖓᑦ ᐊᒻᒪᓗ ᓇᑲᑎᕆᕕᖓᑦ ᓇᔪᒐᓪᓗᐊᑕᕆᕙᕗᑦ. ᐊᒡᒍᑐᖅᓯᒪᔪᖅ ᐱᖓᓱᐃᓕᖅᑲᖓᔪᒥᑦ ᐊᒻᒪᓗ ᓇᔪᒐᔅᓴᐅᖏᑦᑑᒐᓗᐊᖅ, ᓱᓪᓗᑯᑖᖏᑦ ᓂᕈᑭᑦᑐᑎ, ᐊᓂᖅᑎᕆᔾᔪᑎᖃᑦᑎᐊᕋᓂ, ᐃᒐᓛᖃᒡᒐᖅᑐᓂ, ᐃᓪᓗᕈᓯᕋᓛᒡᒍᑕᐅᓪᓗᑎ, ᐅᐊᔭᖏᑦ ᓱᓪᓗᓕᖏᓪᓗ ᖄᖓᒍᑦ ᓴᓇᔭᐅᓕᖅᑭᔅᓯᒪᓪᓗᑎ, ᑐᓴᖅᓴᐅᖏᔾᔪᑎᖃᒡᒐᖅᑐᓂᓗ, ᖁᖁᐊᕈᑎᓪᓗᐊᑕᖃᕋᓂ ᑎᒻᒥᑳᖅᑎᑎᔾᔪᑎᓪᓗᐊᑕᖃᕋᓂ, ᐃᓪᓗᓗ ᐃᑯᐊᓪᓚᒋᐊᑭᑦᑐᐊᓅᓪᓗᓂ ᐊᒻᒪᓗ ᐊᓪᓚᕝᕕᖁᑎᖏᓐᓄᑦ ᐅᐃᒍᓯᒪᒡᒐᖅᑐᓂ ᑐᖅᑲᑕᕐᕕᓪᓗᐊᑕᐅᒐᓗᐊᖅᑐᓂ. ᖃᕋᓴᐅᔭᓄᑦ ᐅᐊᔭᖏᑦ ᐊᕙᓗᑎᒍᑦ ᐃᓪᓘᓪᓗ ᖁᓕᖓᒍᑦ ᑭᑭᐊᔅᓯᒪᕗᑦ ᐅᐊᔭᓖᕕᑭᔅᓱᖅᑐᓂ ᐃᓪᓗ. ᐃᓪᓗ ᐊᓂᖅᑎᕆᑦᑎᐊᓇᓐᖏᑦᑐᖅ. ᓂᓪᓚᑖᕈᑎᑭᔅᓴᖅᑐᓂᓗ ᐊᒻᒪᓗ ᐳᔪᕋᓛᖏᔭᐃᔾᔪᑎᖃᒡᒐᖅᑐᓂ ᓂᐱᓕᐅᕆᔾᔪᑎᓂᑦ ᐊᒻᒪᓗ ᐃᑲᕐᕋᓄᑦ ᐊᒥᓱᐊᓗᓐᓄᑦ ᓂᐱᓕᐅᒐᕐᓄᑦ ᑐᖅᑯᖅᑕᐅᓯᒪᔪᓂᑦ. ᐊᓇᕐᕖᑦ ᐊᒥᒐᖅᓯᒻᒥᔪᑦ ᐃᓄᒋᐊᑦᑎᓪᓗᒋᑦ ᐃᖅᑲᓇᐃᔭᖅᑎᑦ, ᖁᕐᕖᓪᓗ ᓯᒥᑉᐸᑦᑐᑎ ᐅᑭᐅᒃᑯᓪᓗ ᖁᐊᕈᑎᕙᑦᑐᑎ.

ᓇᔪᖅᑕᕗᑦ ᐅᓪᓗᒥ, ᐊᓇᕐᕕᖏᓪᓗ, ᐊᑐᒐᔅᓴᐅᖏᑦᑐᑦ ᑎᒥᒥᒍᑦ ᖃᓄᐃᒍᑎᓕᓐᓄᑦ, ᑭᓪᓕᓕᖅᓱᐃᒍᑕᐅᕗᖅ ᑕᒪᓐᓇ ᓄᓇᓕᑦᑎᓃᑦᑐᑦ ᐃᓚᓐᖑᕈᓐᓇᕋᑎ. ᖃᐅᔨᓴᕐᓂᐅᓯᒪᔪᖅ ᓇᓗᓇᐃᖅᓯᔪᕗᖅ ᐃᓪᓗᑉ ᓱᒃᑯᐸᓪᓕᐊᓂᖓᓂᑦ ᐊᒻᒪᓗ ᐋᖅᑭᔅᓱᐃᕕᕗᑦ ᐊᑲᕐᕆᑐᐃᓐᓇᖏᒻᒪᑦ ᐅᓗᕆᐊᓇᖅᑐᖅᑕᐅᖅ. ᓴᓇᔭᐅᓂᕐᓗᔅᓯᒪᓂᖓ, ᐊᓄᕋᔮᖅᑎᑎᔾᔪᑎᑭᔅᓱᕐᓂᖓ ᐊᒻᒪᓗ ᐅᐊᔭᖏᑦ ᐃᑯᐊᓪᓚᑎᑦᑎᑐᐃᓐᓇᕆᐊᖃᕐᓂᖏᓐᓄᑦ ᐃᖅᑲᓇᐃᔭᖅᑎᖏᓐᓄᑦ ᓇᔫᑎᕙᑦᑐᓄᑦ, ᖃᐃᖅᑯᔭᐅᓯᒪᕙᑦᑐᓄᓪᓗ ᑕᕐᕆᔮᓕᐅᖅᑎᓪᓗᑕ ᐃᓚᒋᔭᐅᕙᑦᑐᓄᓪᓗ ᐋᖅᑭᔅᓱᐃᑎᓪᓗᑕ ᐊᒻᒪᓗ ᓂᐱᓕᐅᒐᑦ ᑕᕐᕆᔭᓕᐅᒐᑦ ᐃᓄᓐᓂᑦ ᐱᓐᓇᓇᖅᑐᑦ ᐱᖅᑯᓯᑦᑎᓐᓅᖓᔪᓪᓗ ᑐᖅᑯᖅᓯᒪᔪᑦ.

ᓄᑖᒥᑦ ᐱᒋᐊᕐᓂᖃᕆᐊᖃᓕᖅᑐᒍᑦ – ᐃᓪᓗᑖᖅᑲᐅᓕᕐᓗᑕ ᐱᔨᑦᑎᕋᑦᑎᐊᕐᓗᒋᑦ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯ ᑲᓇᑕᒥᑦ ᐃᖃᓗᓐᓂᑦ ᑐᖅᑲᑕᕐᕕᖓᓂᑦ.