ᑕᑯᕋᓐᓈᒐᔅᓴᑦ

ᓄᓇᕗᒻᒥᑦ ᑐᓴᒐᒃᓴᓂᐊᕐᕕᒃᓴᖅ ᐊᒻᒪ ᑕᑯᕋᓐᓈᒐᓄᑦ ᐅᐸᑲᖅᑕᕐᕕᒻᒧᑦ ᐱᔪᒥᓇᕈᑎ – ᔮᓂ ᓄᑖᒥ ᐊᖏᕐᕋᖅᑖᕆᐊᑐᔪᖅ. ᔫᑑᑉ-ᑯᑦ ᑕᕐᕆᔮᖅ:

ᑕᑯᒋᓇᐃ – ᓱᕈᓯᕐᓄᑦ ᑕᑯᕋᓐᓈᒐᖅ ᐅᓇ ᑕᑯᕋᕐᓂᕆᔭᐅᔪᒻᒪᕆᐅᔪᖅ ᓄᓇᖃᖅᑳᖅᑐᑦ ᐅᖃᐅᓯᖏᑎᒍᑦ ᐋᖅᑭᔅᓱᒐᖅ ᓄᓇᕐᔪᐊᑉ ᐱᖓᓐᓇᖓᓂᑦ ᓱᕈᓯᕐᓅᓕᖓᔪᖅ. ᑕᑯᒋᓇᐃ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᖏᓐᓂᑦ ᓯᕕᑐᓂᖅᐹᒥᑦ ᐃᖏᕐᕋᑎᑕᒐᕆᔭᐅᔪᖅ. ᖃᐅᔨᒪᔮᖑᔪᖅ ᐊᒻᒪᓗ ᖁᕕᐊᒋᔭᐅᔪᒻᒪᕆᐅᓪᓗᓂ. ᑕᑯᕋᓐᓈᒐᖅ ᐊᓚᒃᑲᐅᒪᑎᑦᑎᓲᖅ ᐆᒥᖓ ‘ᔮᓂ-ᒥᑦ’ ᐊᕕᓐᖓᖅ ᐊᒻᒪᓗ ᐊᓯᖏᑦ ᐊᒡᒐᒻᒧᑦ ᐊᐅᓚᑎᑕᒐᑦ ᒪᒃᑯᑦᑐᑎ ᐅᖃᖅᑎᒋᔭᐅᓲᑦ. ᑕᑯᒋᓇᐃ ᐃᓕᓴᐃᕙᑉᐳᖅ ᐃᓄᓐᓂᑦ ᓱᕈᓯᕐᓂᑦ ᐃᓕᖅᑯᓯᖏᓐᓂᑦ ᓲᕐᓗ ᑕᑎᒍᓱᓐᓂᕐᒥᑦ ᐃᓐᓇᑎᓐᓂᑦ, ᑲᑐᔾᔨᓂᖅ ᐊᒻᒪᓗ ᕿᓄᐃᓵᕐᓂᕐᒥᑦ ᐊᒻᒪᓗ ᐊᓕᐊᓇᐃᒍᓱᓐᓂᕐᒥᑦ ᓱᓕᕆᑎᓪᓗᒋᑦ. ᑕᑯᒋᓇᐃ ᐃᓕᓴᐃᕙᒃᑭᕗᖅ ᐃᓄᒃᑎᑐᑦ ᓈᓴᐃᓂᕐᒥᑦ ᐊᒻᒪᓗ ᑎᑎᕋᐅᓯᕐᒥᑦ. ᑕᑯᒋᓇᐃ ᓴᖅᑭᖅᑎᑕᐅᒋᐊᓐᖓᓚᐅᖅᓯᒪᔪᖅ ᓱᕈᓯᕐᓄᑦ ᐊᕐᕌᒍᓕᓐᓄᑦ 5-ᒥᑦ 7-ᒧᑦ ᑭᓯᐊᓂᑦᑕᐅᖅ ᑭᒃᑯᑐᐃᓐᓇᑦᑎᐊᓄᑦ ᐊᕐᕌᒍᖃᑎᒌᓐᖏᑦᑐᓄᑦ ᖁᕕᐊᒋᔭᐅᓲᖑᕗᖅ. ᒫᓐᓇᒃᑯᑦ ᐱᓕᒻᒪᔅᓴᐃᕙᓕᖅᑯᒍᑦ ᖃᕋᓴᐅᔭᒃᑯᑦ ᐋᖅᑭᔅᓱᐃᓂᕐᒥᑦ ᐊᐅᓚᔪᓂᑦ. ᑕᑯᒋᓇᐃ ᐃᑲᕐᕋᐅᑉ ᓇᑉᐸᖓᓂᑦ ᐊᓚᒃᑲᐅᒪᓲᖅ ᐃᖃᓗᓐᓂᑦ ᐋᖅᑭᔅᓱᒐᐅᓪᓗᓂ ᐃᓚᖏᑦ ᐋᖅᑭᔅᓱᒐᑦ ᐋᖅᑭᓱᖅᑕᐅᓲᖑᒋᓪᓗᑎ ᐊᓯᖏᓐᓂᑦ ᑕᕐᕆᔮᔅᓴᓕᐅᕆᕕᓐᓂᑦ. ᐅᖃᐅᓯᖅ: ᐃᓄᒃᑎᑐᑦ (ᖃᓪᓗᓈᑎᑐᑦ ᖄᖓᒍᑦ ᓂᐱᓕᐅᖅᑕᐅᓯᒪᒋᓪᓗᑎ).

 

ᖃᓄᖅ ᐃᓱᒪᕕᑦ? ᐅᖄᓚᖃᑦᑕᕐᓇᖅ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᑦ ᑕᕝᕙᓴᐃᓐᓇᖅ ᐊᓚᒃᑲᐅᒪᑎᒐᖓᑦ, ᐅᖄᓚᖃᑦᑕᑎᑦᑎᓂᒃᑯᑦ ᖃᓄᖅ ᐃᓱᒪᕕᑦ? ᐱᕕᖃᖅᑎᑦᑎᓲᖑᕗᖅ ᐅᑭᐅᖅᑕᖅᑐᒥᐅᓂᑦ ᑕᑯᕋᓐᓈᖅᑎᓂᑦ ᐅᖃᐅᓯᖃᖁᓪᓗᒋᑦ ᒫᓐᓇᒃᑯᑦ ᐱᕙᓪᓕᐊᔪᓂᑦ. ᐅᖃᐅᓯᐅᕙᑦᑐᑦ ᒪᑯᓂᖓ ᐃᓚᓕᐅᔾᔨᓪᓗᑎ ‘ᑭᓱᓂᑦ ᐃᓱᒪᔾᔪᓯᖃᕐᓂᐅᔪᑦ’ – ᐊᖏᔪᖅᑳᖑᓂᕐᒧᑦ, ᐃᓗᓯᓕᕆᓂᕐᒧᑦ, ᐅᖃᐅᓯᓕᕆᓂᕐᒧᑦ, ᐃᓄᐃᑦ ᖃᐅᔨᒪᓂᖏᓐᓂᑦ, ᓯᓚᐅᑉ ᐊᓯᔾᔨᐸᓪᓕᐊᓂᖓᓂᑦ, ᖀᒻᒦᔭᐃᓂᕐᒥᑦ ᐊᒻᒪᓗ ᐱᓐᓇᓇᖅᑐᓂᑦ ᐱᕙᓪᓕᐊᔪᓂᑦ. ᐅᖄᓚᖃᑦᑕᑎᑦᑎᓂᖅ ᐱᓇᓱᐊᕈᓯᑕᒫᑦ ᐊᐅᓚᓂᖃᓲᑦ ᐃᑲᕐᕋᐅᓗᐊᖅᑐᒥᑦ (90 ᒥᓂᑦᔅ) ᐊᕐᕌᒍᓕᓐᓄᑦ 18-ᓂᑦ – 60-ᒧᑦ ᐃᓱᒪᒋᔭᐅᓪᓗᑎ. ᐅᖃᐅᓯᖅ: ᐃᓄᒃᑎᑐᑦ.

 

ᖃᓄᕐᓕ? – ᒪᒃᑯᑦᑐᓄᑦ ᑕᑯᕋᓐᓈᒐᖅ ᖃᓄᕐᓕ?  ᑯᓕᓪᓗ ᐱᖓᓱᓂᑦ (13) ᑕᑯᔅᓴᐅᑎᑕᒐᖃᖅᑯᑦ ᐊᒡᒍᖅᑐᖅᓯᒪᔪᓂᑦ ᐅᖃᓕᒫᒐᑎᑐᑦ ᒪᒃᑯᑦᑐᓅᓕᖓᔪᖅ ᐅᓪᓗᒥᓕᓴᕐᓂᑦ ᐊᑐᖅᑕᐅᔪᓂᑦ ᐊᒻᒪᓗ ᐃᓕᖅᑯᓯᕐᒧᑦ ᑐᓐᖓᔪᓂᑦ ᐅᑭᐅᖅᑕᖅᑐᒥᐅᓄᑦ. ᓄᑕᐅᓂᖅᓴᒥᑦ ᑕᑯᓐᓇᒐᐅᓪᓗᑎ ᐊᒻᒪᓗ ᐃᓱᒪᔾᔪᓯᐅᓪᓗᑎ, ᖃᓄᕐᓕ? ᑕᑯᖅᑯᔾᔨᕗᖅ ᐅᓪᓗᒥᓕᓴᕐᓂᑦ ᒪᒃᑯᑦᑐᓅᓕᖓᔪᖅ ᑕᓚᕕᓴᒃᑯᑎᒍᑦ. ᑕᑯᖅᑯᔾᔨᕗᖅ ᐅᓪᓗᒥᐅᓕᖅᑐᖅ ᐃᓄᐃᑦ ᒪᒃᑯᑦᑐᑦ ᐃᓅᓯᕆᔭᖏᓐᓂᑦ ᐊᒻᒪᓗ ᑕᑯᖅᑯᔾᔨᓯᓐᓈᖅᑐᖅ ᐃᓄᐃᑦ ᒥᑕᒍᓯᖏᓐᓂᑦ ᓄᑕᐅᔪᒥᑦ. ᑕᑯᓐᓇᒐᒃᓴᐃᑦ ᐃᓚᓕᐅᔾᔨᕗᑦ ᐅᑯᓂᖓ: ᐱᔪᓐᓇᕐᓂᓕᓐᓂᑦ ᐃᔾᔪᐊᕈᒥᓇᖅᑐᓂᑦ ᓄᓇᕗᒻᒥᐅᑕᓂᑦ ᒪᒃᑯᑦᑐᓂᑦ; ᑎᑦᑎᓇᖅᑐᑦ ᖃᓄᐃᓐᓂᐅᓕᖅᑐᑦ ‘ᓯᕙᓛᖅ ᐱᕙᓪᓕᐊᔪᒃᑯᑦ’; ᑕᑯᔅᓴᐅᑎᑕᐅᑲᐃᓐᓇᒐᑦ ᐱᓪᓗᕆᑦᑐᑦ ᐱᖁᑎᑦ ᐊᒻᒪᓗ ᐃᓱᒪᒋᔭᐅᔾᔪᑕᐅᔪᑦ ᑭᒡᒐᖅᑐᖅᑏᑦ; ᒥᑕᑦᑐᑦ ᐱᓐᖑᐊᓂᒃᑯᑦ ᐊᒻᒪᓗ ᑎᑦᑎᓇᖅᑐᑦ ᑎᑎᖅᑐᒐᐃᑦ; ᐊᒻᒪᓗ ᖃᓄᕐᓕ? ᐅᖃᖅᑎᖏᑦ, ᐃᓄᒃ ᐊᒻᒪᓗ ᓂᐸᖏ, ᑕᑯᔅᓴᐅᑎᑦᑎᑎᓇᓱᐊᒡᒐᑎᓪᓗᒋᑦ ᑕᑯᓐᓇᒐᕐᒥᑦ ᑕᑯᓐᓇᒐᐃᑦ ᐃᓗᐊᒍᑦ ᐊᑎᓕᒻᒥᑦ ‘ᑕᑯᓐᓇᒐᖅ.” ᐅᖃᐅᓯᖅ: ᐃᓄᒃᑎᑐᑦ (ᖃᓪᓗᓈᑎᑐᑦ ᐊᑖᒍᑦ ᑎᑎᖅᑲᖃᖅᑐᑎ).

 

ᐃᓕᓐᓂᖅ ᐃᓕᓐᓂᖅ ᖁᓕᓪᓗ ᐱᖓᓱᓂᑦ (13) ᑕᑯᔅᓴᐅᑎᑕᒐᖃᖅᑯᖅ ᐃᓐᓇᕐᓄᑦ ᑐᕌᖓᓪᓗᑎ. ᓄᓇᕗᒻᒥᑦ ᒐᕙᒪᓕᕆᓂᕐᒥᑦ ᐊᒻᒪᓗ ᐃᓄᓐᓅᓕᖓᔪᓂᑦ ᑕᑯᔅᓴᐅᑎᑦᑎᔪᖅ ᑐᐊᕕᖅᑐᒃᑯᑦ ᐱᕙᓪᓕᐊᓂᖃᖅᓯᒪᓪᓗᑎ ᑕᐃᒪᓐᖓᓂᑦ ᐃᓄᐃᑦ ᐃᓐᓇᑐᖃᐃᑦ ᑲᑎᓚᐅᖅᓯᒪᒻᒪᑕᓂᑦ ᑳᕈᑕᓐ ᓯᓚᑦᑐᓴᕐᕕᖓᓂᑦ ᑲᑎᒋᐊᓐᖓᓚᐅᖅᓯᒪᒻᒪᑕᓂᑦ. ᓯᕕᑭᑦᑐᒃᑯᑦ, ᐃᓄᐃᑦ ᓄᓇᓕᓐᓂᑦ ᓅᓚᐅᖅᓯᒪᒻᒪᑕ ᓄᓇᓕᒋᓕᖅᑕᖏᓐᓄᑦ. ᐅᑯᐊ ᑕᑯᔅᓴᐅᑎᑕᒐᑦ ᑕᑯᖅᑯᔾᔨᕗᑦ ᐊᔾᔨᒌᓐᖏᑦᑐᓂᑦ ᐊᑐᖅᑕᐅᓯᒪᔪᓂᑦ. ᐅᓇ ᐋᖅᑭᔅᓱᒐᖅ ᑕᑯᖅᑯᔾᔨᕗᖅ 13-ᓂᑦ ᐃᓄᓐᓂᑦ ᒪᓕᒐᓕᐅᖅᑎᓂᑦ, ᐃᓐᓇᕐᓂᑦ ᑐᓴᒐᒃᓴᓂᐊᖅᑎᓄᑦ ᐊᒻᒪᓗ ᒐᕙᒪᓕᕆᓂᖅ ᐃᓄᓕᕆᓂᕐᓗ ᖃᓄᖅ ᐃᓄᐃᑦ ᐃᓕᖅᑯᓯᖓᓐᓂᑦ ᐱᓐᖑᖅᑎᑎᓯᒪᒻᒪᖔᑦ. ᐅᑯᐊ ᑕᑯᓐᓇᒐᐃᑦ ᑐᑭᓯᔾᔪᑕᐅᓯᓐᓈᖅᑯᑦ ᓱᒻᒪᑦ ᑖᒃᑯᐊ ᐃᓄᐃᑦ ᖃᐅᔨᒪᔮᖑᒻᒪᖔᕐᒥ ᓄᓇᕗᒻᒥᑦ. ᐅᖃᐅᓯᖅ: ᐃᓄᒃᑎᑐᑦ (ᖃᓪᓗᓈᑎᑐᑦ ᐊᑖᒍᑦ ᑎᑎᖅᑲᖃᖅᑐᑎ).

 

ᓂᕿᑦᓯᐊᑦ – ᓂᕿᓕᐅᕐᓂᕐᒧᑦ ᑕᑯᕋᓐᓈᒐᖅ ᓂᕿᑦᓯᐊᑦ ᑕᑯᖅᑯᔾᔨᕗᖅ ᓂᖀᑦ ᐅᐸᓗᖓᐃᔭᖅᑕᐅᕙᓐᓂᖏᓐᓂᑦ ᐊᒻᒪᓗ ᓂᕿᓕᐅᕐᓂᕐᒥᑦ ᐃᓄᐃᑦ ᓂᕿᑐᖃᖏᓐᓂᑦ. ᓂᕆᑦᑎᐊᕐᓂᖅ ᐊᒻᒪᓗ ᐃᓅᑦᑎᐊᕐᓂᖅ ᑲᔪᖏᖅᓴᐅᑎᐅᕗᑦ ᒪᒪᖅᑐᓂᑦ ᐅᐸᓗᖓᐃᔭᐃᓂᕐᒥᑦ ᐃᓄᔅᓯᐅᑎᓂᑦ, ᓄᓇᓕᓐᓂᓗ ᓂᕿᖏᓐᓂᑦ ᐊᑐᐃᓐᓇᐅᒪᔪᓂᑦ. ᓂᕿᓕᐅᖅᑎᒋᔭᐅᔪᖅ ᕇᐱᑲ ᕖᕕ, ᐃᓚᖏᑦ ᐊᓚᒃᑲᐅᒪᑎᑕᑦ “ᖃᐃᖅᑯᔭᐅᓯᒪᔪᒥᑦ” ᐃᑲᔪᖅᑎᖃᖅᑯᑦ ᓂᕿᓕᐅᖅᑎᓂᑦ. ᓂᖀᑦ ᓇᑭᓐᖔᕐᓂᒥᓂᖏᑦ ᐊᓚᒃᑲᐅᒪᑎᑕᐅᒋᕗᑦ – ᐃᒪᕐᒥᐅᑕᖅ, ᓯᑯᒥᐅᑕᖅ, ᓄᓇᒥᐅᑕᖅ ᓯᓚᐃᓐᓇᒥᓪᓗᑭᐊᖅ. ᓂᕿᑦᓯᐊᑦ ᐃᑲᕐᕋᐅᑉ ᓇᑉᐸᖓᓂᑦ ᐊᓚᒃᑲᐅᒪᕙᑦᑐᑦ ᑭᒃᑯᑐᐃᓐᓇᕐᓅᓕᖓᓪᓗᓂ. ᐅᖃᐅᓯᖅ: ᐃᓄᒃᑎᑐᑦ (ᖃᓪᓗᓈᑎᑐᑦ ᐊᑖᒍᑦ ᑎᑎᖅᑲᖃᖅᑐᑎ).

ᓯᕗᕐᖓᒍᑦ ᐋᖅᑭᔅᓱᒐᑦ:

ᓄᓇᑦᑎᓐᓂ

ᖃᒡᒋᖅ